Nicanor Rodríguez Álvarez, nom esquecemos!
Carpinteiro ebanista nascido 15 de maio de 1904 em Gaiás [Lobeira], faleceu 2 de junho de 1939 no seu domicílio, a consequência das sequelas provocadas polo maltrato a que foi submetido durante a sua detençom e posterior prisom.
“Miocardite aguda abcesso de base de pulmom direito postneumonial” é a explicaçom oficial da sua morte, tal como aparece na ata de defunçom emitida polo Julgado de Lobeira.
Nicanor Rodríguez Álvarez foi o Primeiro Tenente de Alcaide de Lobeira, e como um dos mais destacados dirigentes da Frente Popular neste concelho do Val do Límia.
Segundo testemunha a sua filha Ramona, estivo preso primeiro em Cela Nova, posteriormente em Ourense, para novamente ser transferido a Cela Nova. Lembra que sendo umha nena de tam só seis e sete anos, acompanhava a sua mae a visitar Nicanor na prisom na que foi transformada umha parte do convento de Sam Salvador de Cela Nova. “Iamos em burro de Meás a Cela Nova, logo traiamos as alforjas carregadas de comida.
INVESTIGAÇOM E CONDENA
No Informe elaborado polo juíz instrutor de Ourense, datado 9 de julho de 1941, dirigido ao Tribunal Regional de Responsabilidades Políticas” da Corunha, Nicanor é acusado de ter sido “Primer Teniente de Alcalde en dicho municipio [Lobeira] y activo propagandista en favor de los partidos de izquierdas en las últimas elecciones de Diputados”.
A sentença nº 595/941 -emitida polas ilegítimas autoridades fascistas contra o governo municipal de Lobeira-, ditada polo Tribunal presidido por Eduardo Martínez Nieto, exercendo como vogais Marcial del Río y Díaz e José Antonio Quiroga y Martínez de Pisón, condenou com multa de 100 pesetas a Nicanor -já falecido dous anos antes-.
REPARAÇOM DA VERDADE
Recuperarmos a memória histórica dos melhores filhos do Val do Límia, deliberadamente condenados ao ostracismo pola amnésia imposta pola ditadura franquista e os posteriores acordos políticos da denominada “Transiçom”, segue sendo a nossa principal tarefa e razom de ser.
HOMENAGEM PENDENTE
O Concelho de Lobeira, como instituiçom municipal, tem umha dívida contraída com Nicanor Rodíguez Álvarez, que deve ser reabilitado institucionalmente polo Pleno, e homenageado com o seu nome um espaço público do Concelho.
Como Comité pola Memória Histórica do Val do Límia continuamos sem descanso contribuíndo à reparaçom da verdade, da justiça, e da dignidade coletiva.
O Val do Límia nem esquece nem perdoa!
