Memória Histórica do Val do Límia

Na manhá do sábado 25 de maio tivo lugar na aldeia arraiana de Sernande, pertencente ao concelho portugués de Vinhais [PT], umha homenagem ao guerrilheiro galego dos Corços, A Veiga, Alfredo Yañez Domínguez ‘O Aguirre’, abatido 5 de novembro de 1947 num operativo misto de um centenar de forças repressivas portuguesas e espanholas.

Organizado por Amigos da República presidida por David Simón Lorda, e com a colaboraçom da Uniāo de Freguesias de Quirás e Pereiro Novo, mais a Associaçom Cultural Os Torgueiros e o Concelho da Guidinha, foi inaugurada um placa no adro da capela de Santo António, com presença dos familiares do combatente galego.

Além das entidades mencionadas interviu o historiador Dionísio Pereira, quem com Lola Varela, som os promotores da recuperaçom de Sernande como um dos centros medulares de acolhida, refúgio e base da guerrilha antifascista entre 1939 e finais da década de ’40, e o reconhecimento ao seu povo quem padeceu tortura e sofreu detençons por exercer consequentemente a solidariedade de classe.

Pola tarde tivo lugar na Casa da Viúva da Gudinha a projeçom do documentário ‘A menina que via homes encadeados’, com a posterior intervençom de um dos seus autores, Javier López Rodríguez, e de Felipe Lubián, alcaide de Lubiam.

As jornadas finalizárom com umha conferéncia de Alejandro Rodríguez Gutiérrez, historiador de Sputnik Labrego, especializado na Federaçom de Guerrilhas de Leom-Galiza.

Umha delegaçom do Comité pola Memória Histórica do Val do Límia participou na homenagem, realizando umha sentida lembrança ao Víctor García García ‘O Brasileiro’, comandante da guerrilha comunista com retaguarda em Castro Laboreiro, que operou no Val do Límia entre 1939 e 1943, e que estivo em Sernande em agosto de 1940.

Obrigado a Amigos da República por esta importante iniciativa.