Nicanor Rodríguez Álvarez, identificado como nova vítima do fascismo no Val do Límia

Carpinteiro ebanista nascido 15 de maio de 1904 em Gaiás [Lobeira] faleceu 2 de junho de 1939.
Tal como nos relatou a sua família, Nicanor morreu no seu domicílio a consequência das sequelas provocadas polo maltrato a que foi submetido durante a sua detençom e posterior prisom.
“Miocardite aguda abcesso de base de pulmom direito postneumonial” é a explicaçom oficial da sua morte, tal como aparece na ata de defunçom emitida polo Julgado de Lobeira.
 
Sábado 5 de outubro, umha delegaçom do Comité pola Memória Histórica do Val do Límia mantivo em Santa Cuz de Grou um encontro com os seus familiares, destacando a presença de Ramona Rodríguez Álvarez, umha das cinco filhas e filhos do matrimónio de Nicanor com Segunda Álvarez Domínguez.
Segundo testemunha a sua filha Ramona, o seu pai foi excarcerado com graves problemas de saúde que lhe impossibilitavam exercer em condiçons o seu ofício de reputado ebanista. Tal como nos contou “morreu porque se lhe estropeou o sangue”.
 
PRIMEIRA AUTORIDADE REPUBLICANA DE LOBEIRA
Afortunadamente para poder reconstruir parcialmente os trágicos sucessos, contamos com o Expediente aberto em 1941 contra a corporaçom municipal republicana de Lobeira, polo Julgado 62 do Tribunal 1019 de Ourense, dependente do “Tribunal Regional de Responsabilidades Políticas” da Corunha,.
Nicanor Rodríguez Álvarez aparece como Primeiro Tenente de Alcaide de Lobeira, e como o mais destacado dirigente da Frente Popular neste concelho do Val do Límia.
Segundo testemunha a sua filha Ramona, estivo preso primeiro em Cela Nova, posteriormente em Ourense, para novamente ser transferido a Cela Nova. Lembra que sendo umha nena de tam só seis e sete anos, acompanhva a sua mae a visitar Nicanor na prisom na que foi transformada umha parte do convento de Sam Salvador de Cela Nova. “Iamos em burro de Meás a Cela Nova, logo traiamos as alforjas carregadas de comida. Nesse momento foi a primeira vez que provei a empanada. Um dos cozinheiros da prisom era da Fraga e conhecia bem à família”.
 
INVESTIGAÇOM E CONDENA
No Informe elaborado polo juíz instrutor de Ourense, datado a 9 de julho de 1941, dirigido ao Tribunal Regional de Responsabilidades Políticas” da Corunha, Nicanor é acusado de ter sido “Primer Teniente de Alcalde en dicho municipio [Lobeira] y activo propagandista en favor de los partidos de izquierdas en las últimas elecciones de Diputados”. No relatório também consta que “No habiéndose presentado por sus herederos la relación jurada de bienes que les autoriza el artículo 50 de la Ley oportunamente se dió cuenta de ello en ese Tribunal, librándose los testimonios prevenidos. Las Autoridades en sus informes le suponen una capacidad económica de unas Mil pesetas, y manifiesta que sus hijos y esposa no ganan sueldo ni jornal alguno”.
A sentença nº 595/941 -emitida polas ilegítimas autoridades fascistas contra o governo municipal de Lobeira-, ditada polo Tribunal presidido por Eduardo Martínez Nieto, exercendo como vogais Marcial del Río y Díaz e José Antonio Quiroga y Martínez de Pisón, condenou com multa de 100 pesetas a Nicanor -já falecido dous anos antes-.
Destacar que na documentaçom do expediente contra Nicanor, aparece também acusado de “estampilhado de bilhetes”. Durante a II República espanhola foi habitual carimbar com a nova simbologia republicana os bilhetes com a face de Alfonso XIII que ainda nom tinham sido retirados polo Banco de Espanha. Esta mesma prática foi exercida polo Governo franquista contra a moeda republicana e polo Governo republicano contra as pesetas emitidas pola Junta militar de Burgos.
 
REPARAÇOM DA VERDADE
Congratulamo-nos de seguir avançando na recuperaçom da memória histórica dos melhores filhos do Val do Límia, deliberadamente condenados ao ostracismo pola amnésia imposta pola ditadura franquista e os posteriores acordos políticos da denominada “Transiçom”.
Agradecemos à família de Nicanor Rodríguez Álvarez, a sua filha Ramona Rodríguez Álvarez, aos seus netos Pilar, José Antonio e Pepe, a Feli e a sua bisneta Silvia, quem contatou connosco, a sua absoluta colaboraçom à hora de identificar, de fornecer-nos fotografias e relevante informaçom da vigésima sétima vítima constatada da barbárie fascista no Val do Límia.
A sua perserverância para manter viva a sua figura durante tantas décadas de esquecimento, a firme vontade de contribuir a restaurar a sua figura, som um exemplo a seguir.
Hoje avançamos na reparaçom da verdade, da justiça, e da dignidade coletiva.
Ainda fica muito caminho por andar.
O Concelho de Lobeira como instituiçom municipal tem umha dívida contraída com Nicanor, que deve ser reabilitado institucionalmente polo Pleno e homenageado com o seu nome um espaço público do Concelho.
 
SOLICITUDE DE COLABORAÇOM
No processo contra Nicanor também aparecem acusados e condenados outros quatro membros da Corporaçom Municipal de Lobeira no verao de 1936: Antonio Araújo García, Joaquín Alfonso Pérez, Pío Silverio Domínguez González e Santiago Álvarez Adán.
Destacar que deste último, as autoridades fascistas afirmam ter falecido em Portugal onde se teria refugiado para evitar a repressom.
Solicitamos aos familiares de todos eles que contribuam a dignificar as suas figuras, e em especial aos de Santiago Álvarez Adán, que contatem com o Comité pola Memória Histórica do Val do Límia para facilitar informaçom que contribua a esclarecer as causas da sua morte.
Outubro 7, 2019