Comunicado polo 87 aniversário da proclamaçom da I República Galega

Quando o verao de 1931 estava começando, a paralisaçom das obras do caminho de ferro Corunha-Compostela-Ourense-Samora  polo governo da recentemente instaurada II República espanhola, provocou um amplo movimento popular de rejeitamento pola aldraje contra a Galiza.

Em diferentes pontos da Galiza, de Póvoa da Seabra até o Carvalhinho, de Ourense a Compostela, os trabalhadores do ferrocarril secundárom a greve geral arrastando amplos setores populares nas suas demandas de imediato reinício das obras.

Na tarde do dia 26  de junho de 1931 é tomado o Governo Civil de Ourense proclamando a República Galega.

Mas foi na tarde do dia 27 de junho de 1931 quando no Concelho de Compostela é proclamado o Estado Galego, sendo nomeado Antom Alonso Rios presidente da Junta Revolucionária Galega.

A nossa primeira República foi efémera, pois Madrid num veloz movimento tático corrigiu a decisom de paralisar as obras provocando a dissoluçom do movimento popular.

Porém, 27 de Junho é umha data histórica na defesa dos direitos nacionais da Galiza, umha jornada que deve ser recuperada nom desde a nostalgia pitoresca, mas sim como horizonte para construirmos umha sociedade sem exploraçom nem desigualdades, de plenas liberdades individuais e coletivas. Objetivo que só é possível recuperando a nossa soberania nacional.

No 87 aniversário da proclamaçom da 1ª República Galega o Comité pola Memória Histórica do Val do Límia [CMHVL] quer somar-se a esta comemoraçom.

Com toda probabilidade vizinhos e vizinhas da nossa comarca participárom na manhá de 25 de junho de 1931 na toma do Concelho de Ourense proclamando a República Galega. E na tarde de 26 de junho assistírom primeiro à assembleia popular num ateigado Teatro Losada, posteriormente transladada à Alameda perante a afluência de gente, e finalmente na ocupaçom do Governo Civil na rua do Progresso dando vivas a Galiza ceive.

Ao igual que figemos 14 de abril, queremos lembrar e honrar a todas as mulheres e homens que luitárom por umha nova vida e umha nova sociedade. A todos aqueles e aquelas que sem pedir autorizaçom a quem perpetuava o atraso, a discriminaçom, a exploraçom e a opressom, se pugérom maos a obra.

Basicamente a tod@s @s executad@s, reprimid@s, exiliad@s e a quem durante décadas mantivo a resistência e a dignidade antifascista.

Neste 27 de Junho consideramos essencial desmascarar o atual regime postfranquista e a monarquia bourbónica imposta por Franco como umha das tarefas centrais na recuperaçom da memória coletiva. E mais quando sem pudor se desliza face posiçons autoritárias.

Viva a I República Galega e a pola segunda!

Val do Límia, 27 de junho de 2018

 

 

Xuño 27, 2018