1º de Maio de 1936 em Mugueimes [Val do Límia]
Umha das mais importantes e surpreendentes revelaçons extraidas do Livro de Atas do Sindicato Campesinho de Souto, é que em Mugueimes, capital do concelho de Moinhos, foi comemorado em 1936 o Dia do Internacionalismo Proletário.
“No oriente do Val do Límia também se alçárom com orgulho e desafiantes !Rojas banderas en marcha el aire claro fustiga! [Formulaçom extraída do Nº 1 da revista Yunque, 1º de Maio de 1932, editada em Lugo e dirigida por Anxel Fole. Nesta publicaçom literária de vanguarda, de inequívoca orientaçom marxista, fôrom publicados por primeira vez os poemas galegos de Federico García Lorca].
Desconhecemos se noutras localidades como Entrimo ou Bande também se comemorou o 1º de Maio, mas todo indica que sim.
Tal como se recolhe no ponto um da ata da Assembleia ordinária realizada 30 de abril “Se acuerda por unanimidad adherirse a la fiesta de los trabajadores y multar al que haga lo contrario y manifestarse hacia Mugueimes …”.
Desconhecemos o formato da iniciativa , número de assistentes, nome e composiçom dos oradores, tabela reivindicativa, assim como quem fôrom os agentes políticos e sociais que organizárom o 1º de Maio. Possivelmente teria sido umha concentraçom diante da Casa do Concelho, que tinha sido construida uns anos antes, à beira da recem nomeada “praza 16 de fevereiro” [antigo campo de Mugueimes] , convocada polos diversos sindicatos campesinhos de Moinhos com apoio da Frente Popular que governava o Concelho”.
“Além da magna manifestaçom que percorreu as principais artérias da capital da província, tivérom lugar convocatórias em diversas comarcas. Miro Martinez Cerredelo , destaca que na comarca da Límia houvo três convocatórias do 1º de maio, nos concelhos de Sandiás [mitim convocado pola Sociedade Agrária onde exercérom de oradores, entre outros, Benigno Álvarez e Enriqueta Iglesias], Ginzo de Límia [manifestaçom convocada pola UGT e o PSOE, que parte da “entrada do pobo ata ó Campo da Seara”] e Vilar de Bárrio [manifestaçom convocada pola “Sociedad de Oficios Varios y Obras del Ferrocarril”].
[Textos extraidos do livro “Sindicato Campesino de Souto, Val do Límia”, da autoria de Carlos Morais, que editará o CMHVL, e sairá do prelo no mês de julho]
Lamentavelmente nom se conhecem registros gráficos desta mobilizaçom. A ilustraçom corresponde o 1º de Maio de Ourense de 1936.