Limpemos o lixo fascista

A Plataforma Antifascista Galega inícia neste ano 2021, umha campanha visada para a denúncia e retirada da simbologia franquista.
O combate contra a ameaça fascista exige umha resposta organizada para evitar que se fagam donos das ruas, e aumentem o apoio entre os setores precarizados e empobrecidos do povo trabalhador. Desputar a hegemonia cultural e ideológica entre os segmentos populares é um factor fundamental na luita contra o fascismo.
Na atualidade, na Galiza, a simbologia fascista continua presente nos mais diversos espaços, sejam públicos, privados ou religiosos. Da mesma maneira acontece com os títulos, galardóns e condecoraçons outorgados durante a ditadura franquista aos hierarcas fascistas mantidos polas diferentes administraçons e instituiçons do Estado.
Tanto a simbologia fascista como as honras e condecoraçons, incumprem a lei 52/2007 do 26 de dezembro, conhecida como Lei de Memória Histórica. A lei aprovada polo governo do PSOE presidido por José Luis Rodríguez Zapatero, “obriga” às instituiçons a retirar todo vestígio da ditadura franquista.
Além disto, no primeiro trimestre deste ano 2021, o governo de coaligaçom do PSOE-Unidas Podemos tem previsto aprobar a nova Lei de Memória Democrática. Este anteprojeto de lei suporia, sempre e quando se cumpra nos termos atuais, um avanço respeito às reivindicaçons exigidas polos diferentes comités e coletivos de recuperaçom da Memória Histórica.
Devemos exigir o cumprimento da tímida e insuficiente legislaçom vigorante, movimentar ao povo trabalhador e pressionar para que as instituiçons apliquem medidas que nom permitam exibir simbologia franquista em multidom de lugares. Nom podemos permitir que após mais de quatro décadas de pós-franquismo siga havendo centros de ensino, edifícios instititucionais, igrejas, cemitérios, espaços públicos como lavadoiros ou fontes, “engalanados” com símbolos fascistas.
Desde a PAG queremos contribuir a reabrir o debate sobre as causas desta ignomínia que segue honrando os carrascos e a ditadura militar, invisibilizando as mais de 10.000 vítimas da longa noite de pedra do holocausto galego.
Eis polo que temos previsto iniciar, ao longo deste ano, umha série de iniciativas visadas para denunciar e conscienciar ao povo trabalhador sobre a importância de eliminarmos todo vestígio de fascismo, assim como honrar e dignificar às vítimas e familiares dos demócratas e antifascistas assassinados pola ditadura franquista.
Eliminemos todo vestígio de fascismo das nossas ruas!
Limpemos o lixo fascista!
Febreiro 2, 2021