Convertamos a antiga Prisom Provincial de Ourense num museu e centro de interpretaçom da repressom franquista e da resistência antifascista
Numha entevista realizada por Miño TV, Manuel Baltar afirma que contempla como umha possibilidade trasladar as instalaçons da Deputaçom Provincial de Ourense ao edifício da antiga prisom provincial.
O Comité pola Memória Histórica do Val do Límia manifesta a nossa mais rotunda oposiçom a esta proposta.
Tal como já temos reclamado em diversas ocasions, urge umha intervençom das instituiçons para evitar a ruína total do deteriorado antigo cárcere de Ourense, situado na rua do Progresso.
Passárom sete lustros desque que foi fechado, sem que nengumha instituiçom tenha manifestado interesse algum em reabilitá-lo e destiná-lo ao único uso digno que merecem os centos de presos políticos antifascistas do Val do Límia e os milhares de ourensáns que durante os quarenta anos de pedra pagárom neste lugar o compromisso com a causa da liberdade e da justiça social.
A proposta do presidente da Deputaçom Provincial de Ourense deve enquadrar-se na deliberada estratégia de eliminar, ou no melhor dos casos, desfigurar os lugares da infámia da repressom franquista, como parte da amnésia histórica imposta polo franquismo e continuada polo pósfranquismo.
Nas últimas três decadas tenhem sido diversas as propostas neste sentido. Afortunadamente nom tivo êxito a ideia de transformar a velha prisom num hotel balneário, nem num centro de ócio, lúdico, cosmético e de saúde, tampouco numha escola de teatro e artes cénicas, nem na sede da UNED.
O Comité pola Memória Histórica do Val do Límia solicita mais umha salvar as instalaçons da velha prisom e destiná-las a lugar da Memória Antifascista.
A velha Prisom Provincial deve alojar um museu e um centro de investigaçom e interpretaçom da memória e resistência antifascista.
Apelamos ao conjunto das entidades, formaçons, organizaçons e partidos antifascistas de toda a província de Ourense, para constituir um frente comum que pressione às administraçons públicas -Concelho de Ourense, Deputaçom Provincial, Junta da Galiza e Estado espanhol-, para recuperar e salvar a velha Prisom Provincial, convertendo-a num lugar da Memória Antifascista.
Val do Límia, 10 de janeiro de 2022