Antifascistas de Moinhos homenageados em Mugueimes
Mais de 150 pessoas arroupárom a homenagem antifascista realizada no Outeiro da Cela, em Mugueimes.
A intensa chuva, humidade e frio, que caraterizou a tarde do domingo 17 de setembro, nom fôrom quem de mermar a afluência de familiares, tanto das quatro vítimas mortais, como do conjunto de detidos e repressaliados polo fascismo no concelho de Moinhos.
A homenagem conduzida pola Inês Rodríguez deu início com os acordes musicais dos cantautores Roberto Sobrado e Xosé Constenla, quem voltou surpreender com o estreio de duas cançons da sua autoria: ‘Fermín, Eladio, Maruxa e Ramón. Heroicis Vitae’ e ‘Para nunca esquecer’.
A continuaçom Íria Moreiras recitou ‘Venceredes vós’, poema de Darío Xohán Cabana.
Marta Vázquez Silva, em representaçom da Sociedade Cultural, Desportiva e Juvenil Fontefria, transmitiu um saúdo de adesom de Óscar León, presidente da décana entidade associativa de Moinhos.
O poeta de Cela Nova Baldo Ramos, abriu passo às intervençons de Malena de Jesus, Xavier Álvarez Osuna e Agustín Fernández, em representaçom de familiares das vítimas.
De contado recitou Anxo Angueira, quem deu passo às palavras musicadas de Xurxo Souto, apelando a quebrar o silêncio imposto.
Seguidamente tivo lugar o recital poético de Xosé María Álvarez Cáccamo.
Antes da inauguraçom do monólito, da autoria do mestre-canteiro Diego Currás, discursou o presidente do Comité pola Memória Histórica do Val do Límia, Carlos Morais.
Embargadas pola emoçom, sob os acordes do hino nacional, logo de ser desvelado do imenso pano vermelho que o cobria, foi solenemente inaugurado o monumento, sendo depositado por familiares das vítimas umha coroa de loureiros no monólito com os nomes gravados de Benito Valencia Bouza, José Álvarez Fernández, Lisardo Rodríguez León e Lino Tejada Rodríguez.
A continuaçom os assistentes depositárom caraveis vermelhos ao pé da pedrafita de mais de três toneladas e meia, sob os acordes da Internacional.
Posteriormente tivo lugar nas instalaçons do Clube Fontefria no Corgo umha confraternizaçom entre os assistentes.
Novamente agradecemos ao povo antifascista de Moinhos e do Val do Límia, a resposta a esta primeira grande homenagem.
Transmitir à Comunidade de Montes de Mugueimes ter cedido o espaço, a todos os ativistas e simpatizantes do Comité pola Memória Histórica do Val do Límia a sua colaboraçom militante, ao pub Gallaecia por ter instalado a carpa imprescindível para a mínima comodidade de parte dos assistentes, a todos os que contribuirom fazer realidade a merecida homenagem a toda a vizinhança de Moinhos que padeceu nas suas carnes a barbárie do fascismo.