25 de Julho, Dia da Pátria. “Manifesto de Grou”
Nas vésperas do Dia Nacional da Galiza, divulgamos um documento histórico pouco conhecido. O “Manifesto de Grou”, dirigido ao povo da paróquia de Sam Mamede de Grou, pertencente ao concelho de Lóvios, está considerado como o único apelo para comemorar o Dia da Pátria de 1936 no interior do país, quando praticamente o conjunto do território nacional já estava sob controlo fascista, após golpe militar de 18 de julho.
O autor do texto foi o militante nacionalista galego Bieito Fernández [Silvares de Grou 1909- Lugo 1999], que nessa altura formava parte da Federaçom de Mocidades Nacionalistas [FMN], após regressar da emigraçom na Argentina [1926-1935], onde militara na organizaçom independentista Sociedade Nacionalista Pondal e colaborava com o seu jornal A Fouce.
Número III da revista Arraianos, publica umha breve biografia e o diário onde Bieito Fernández conta como procurou refúgio nas solidárias terras de Castro Laboreiro no último dia de março de 1937 para evitar ser executado.
O “Manifesto de Grou” foi editado na imprensa Ferreiro de Cela Nova, e distribuído como panfleto em Grou. Portanto, nestas terras da parte mais oriental do Val do Límia, tivo lugar possivelmente a última açom de propaganda reivindicativa da causa nacional galega, da que se tenha conhecimento, após início do holocausto de 1936.
O documento foi publicado por Claudio Rodríguez Fer em “A literatura galega durante a guerra civil (1936-1939), Vigo, Xerais, 1994.
Também no blogue http://asuvasnasolaina.blogspot.com de Marcos Valcarcel.
Xosé Manuel Nuñez Seixas, na introduçom de re-ediçom facsímile do jornal A Fouce, editado em Vigo por Nova Galicia Edicions em 1992, menciona e destaca a sua impronta no independentismo pondaliano.
MANIFESTO DE GROU
Dia de Galiza de 1936
Ao povo de GROU!
Galegos: Hoxe, 25 de Xullo, data consagrada dende fai tempo como Dia da Patria, querémonos dirixir os nosos conveciños pra lle lembrar a obrigación que temos todo, como galegos, de adicar ao dia de hoxe a exaltazón de todol-os valores da Nazón Galega, tanto esprituaes como materiaes.
Parella coesa exaltazón patriótica é mester tamén que afirmemos a nosa vontade decidida de liberar totalmente a nosa Patria da tiranía extranxeira que a ten asoballada dende fai catro séculos e meio.
Que hoxe, mañan e sempre, se resoen no ámbito da Patria o Hino Nacional Galego e as nosas fermosas cantigas populares; que se bailen e respeten as nosas danzas nacionaes como a muiñeira, a redondiña, a ribeirana, etc; que se lean os periódicos e libros escritos no noso idioma; que se consuman con preferencia os productos galegos, e por último que hoxe, mañán e sempre, so se fale, pense e escriba en idioma galego.
Galegos: Por riba de todol-os partidos políticos e de toda crenza relixiosa: GALIZA, GALIZA e nada mais que GALIZA.
¡VIVA A REPÚBLICA GALEGA!
Grou Dia de Galiza 1936