Fotografia de Ramón Yañez Pereira (a) “Enrique” ou o “Médico”
Nom é habitual encontrar nos sumários franquistas fotografias dos encausados.
Há umhas semanas soubemos polo companheiro Antonio Cardelle que na Causa 025556/1941-1943, depositada no Arquivo Militar de Barcelona, havia várias fotografias de Ramón Yañez Pereira.
Por meio de Manuel Rodríguez Valencia e Alexandra Rodríguez logramos aceder a documentaçom que levamos tempo procurando, a quem agradecemos o seu esforço e bom trabalho.
Divulgamos umha das quatro fotografias que neste momento tem o Comité pola Memória Histórica do Val do Límia.
Destacar que numha delas aparece acompanhado pola sua mulher Teresa Batet Solanes.
A que hoje publicamos semelha ser umha fotografia de “carnet”, procedente de um documento oficial identificativo durante a sua estadia em Barcelona, na etapa da Segunda República espanhola.
A sua caraterizaçom coincide com o que Américo Rodrigues tem recolhido de testemunhos de Castro Laboreiro, quando formava parte da unidade insurgente que operou no Val do Límia entre 1939-1943, comandada polo dirigente comunista Víctor García García ‘Brasileiro’.
Nas bravas terras crastejas o Ramón ainda era lembrado como um “homem alto, magro, costas largas, usava uma pistola de grande calibre”.
Quando tenhamos estudado a Causa completaremos a biografia elaborada por Carlos Morais, com toda a informaçom que temos compilado no último ano graças aos esforços promovidos polo Comité da Memória Histórica de Cela Nova, quem organizou dous atos sobre este guerrilheiro antifascista, 14 de julho e 11 de novembro de 2024 em Cela Nova e Monforte de Lemos respetivamente, esta última com o Concelho da cidade do Cabe.